AQTA YANINDA İCTİMAİ ŞURA ÜZVLƏRİ QİDA TƏHLÜKƏSİZLİYİ İNSTİTUTUNUN FƏALİYYƏTİ İLƏ TANIŞ OLUBLAR

Azərbaycan Qida Təhlükəsizliyi İnstitutunda (AQTİ) Azərbaycan Qida Təhlükəsizliyi Agentliyi (AQTA) yanında İctimai Şura üzvləri ilə görüş keçirilib.

Görüşdə institutun fəaliyyət istiqamətləri, laboratoriyalarda idxal, ixrac və ölkədə istehsal olunan qida məhsullarının təhlükəsizlik, keyfiyyət göstəriciləri üzrə aparılan müayinə və analizləri barədə ətraflı məlumat verilib.

Bildirilib ki, institutun bazasında Bakıda və regionlarda ən müasir tələblərə cavab verən laboratoriyalar yaradılıb, seçilmiş potensiallı kadrlar təlimə cəlb edilərək, laboratoriyalarda müvafiq işlə təmin olunublar. Görüş zamanı laboratoriyalarda müayinələrin beynəlxalq standartlara uyğun, müasir metodlarla həyata keçirildiyi qeyd olunub.

Görüşdə AQTA yanında İctimai Şuranın üzvlərinə institutda aparılan elmi araşdırmalar və keçirilən təlimlər barədə məlumat verilib, onları maraqlandıran suallar cavablandırılıb.